“ილია, ვაჟა, ყაზბეგი ვერ მიხვდა ერეკლეს “ღალატს” და შენ მიხვდი? სასაცილოა” – კონსტანტინე გამსახურდია

საქართველოს პირველი პრეზიდენტის შვილი კონსტანტინე გამსახურდია მიიჩნევს, რომ გეორგიევსკის ტრაქტატი ქართული დიპლომატიის შეცდომა იყო, რომელმაც ვერ გათვალა რუსული აღმოსავლური პოლიტიკური თამაშების ეგოცენტრული დინამიკა.

მისივე შეფასებით, არც ნიკოლოზ ბარათაშვილს, არც ალექსანდრე ბატონიშვილს, (ყველაზე დიდ ანტირუსს) არც ილიას, არც ვაჟას, არც ყაზბეგს, არც ივანე ჯავახიშვილს მეფე ერეკლე მეორეზე არ გამოუყენებია სიტყვა “მოღალატე” და “ქვეყნის ჩამბარებელი”, მიუხედავად იმისა, რომ მათ პოლიტიკურ კატასტროფად მიაჩნდათ ქვეყნის ოკუპაცია და ანექსია.

“სასაცილოა თვლიდე, რომ ისინი ვერ მიხვდნენ და შენ მიხვდი”, – წერს სოციალურ ქსელში კონსტანტინე გამსახურდია.

მისივე შეფასებით, რუსულ რბილ ძალას პროვოცირების მიზნით შიდა პოლარიზაციის 50-ზე მეტი ბლოკი აქვს შემოგდებული, როგორც სამოქალაქო ომის მუხტი, რათა ადამიანებმა ამოუწურავი ბოღმა და სიძულვილი ანთხიონ.

„ძალიან მოკლე პოსტულატებს ჩამოვყრი, რომ რუსული რბილი ძალის შემოგდებული ეს მარაზმი და ლანძღვა-გინება შეძლებისდაგვარად მორჩეს.

1. რუსეთის იმპერია თავის ცარისტულ, ბოლშევიკურ და პოსტკომუნისტურ ფორმაში არის ბოროტება და საფრთხე. მსოფლიო მშვიდობას და სამართლიან წესრიგს მისი დემონტაჟი და ძირეული რეფორმირება ესაჭიროება.

2. გეორგიევსკის ტრაქტატი იყო შეცდომა ქართული დიპლომატიისა, რომელმაც ვერ გათვალა რუსული აღმოსავლური პოლიტიკური თამაშების ეგოცენტრული დინამიკა. რუსეთის იმპერიის ბუნება პროტექტორატს ვერ იგუებდა, თან ეს პროექტები საიმპერატორო კარზე კონკრეტულ პირთან იყო კავშირში, რომელთან ერთადაც მათ “ჩაილურის წყალი დალიეს”. ამიტომ ტრაქტატი რამდენიმე წელიწადში დაირღვა და მისი განახლება ერეკლეს არც უფიქრია. ის, რაც გიორგი “ზაქიჭამიამ” დადო, იყო გაცილებით ცუდი და ამაზრზენი, მაგრამ ერეკლე მისი ვაჟის გამო პასუხისმგებელი ვერ იქნება.

3. ერეკლეს დროს აღმოსავლეთ საქართველო ირანული გადმოსახედიდან, ასევე ოსმალეთის და სხვათა მიერ (მათ შორის ევროპული პერსპექტივითაც) მოიაზრებოდა, როგორც ირანის ნაწილი. ერეკლე საგარეო პოლიტიკას “ცენტრს” იმიტომ არ უთანხმებდა, რომ თავად ირანი იყო შინაომებში ჩაძირული და ურჩი განაპირა მმართველებისთვის არ ეცალა. ხოლო ნადირ-შაჰის დროს ქართლ-კახეთის ეს მეფე ფუნქციონირებდა, როგორც ირანელი მაღალჩინოსანი. ხომ არ შეიძლება ვთქვათ, რომ აღმოსავლეთ საქართველო ირანს აქამდე 150 წლის წინ ვიღაცამ “ჩააბარა?” ან დასავლეთ საქართველო ოსმალეთს?

4. ერეკლეს საგარეო პოლიტიკა 1783 წლამდე ევროპაზე ორიენტირებული იყო. მან ორი ელჩობა გაგზავნა ევროპაში, რომლებიც ჩავარდა რაღაც საქართველოზე დამოუკიდებელ მიზეზთა გამო. ერეკლესეული ქვეყნის შიდა რეფორმებიც სრულიად ევროპული იყო.

5. რუსეთის იმპერიამ გიორგი მეცამეტის გარდაცვალების შემდეგ საქართველო დაიკავა და შეუდგა მის ანექსიას ყოველგვარი ხელშეკრულებების უსარგებლო ქაღალდად გამოცხადების და სანაგვეზე მოსროლის გზით. ქვეყანა არავის არ “ჩაუბარებია”. რუსეთმა ის უბრალოდ დაიპყრო, მორჩა და გათავდა.

6. მთელი კატეგორიულობით ვიტყვი: არც ნიკოლოზ ბარათაშვილს, არც ალექსანდრე ბატონიშვილს, (ყველაზე დიდ ანტირუსს) არც ილიას, არც ვაჟას, არც ყაზბეგს, არც ივანე ჯავახიშვილს მეფე ერეკლე მეორეზე არ გამოუყენებია სიტყვა “მოღალატე” და “ქვეყნის ჩამბარებელი”, მიუხედავად იმისა, რომ მათ პოლიტიკურ კატასტროფად მიაჩნდათ ქვეყნის ოკუპაცია და ანექსია. სასაცილოა თვლიდე, რომ ესენი ვერ მიხვდნენ და შენ მიხვდი.

არ მოვიწონებ არავის ბულინგს, გინდაც გარკვეულ საკითხში მართალი არ იყოს და ცდებოდეს. მე თავად ვარ დაუსრულებელი ბულინგის მსხვერპლი, (ამ თემებს არ ეხება, სხვა განყოფილებაა) რის გამოც მალე ვაპირებ მივმართო სამართალდამცავ ორგანოებს.

გაითვალისწინეთ, რომ რუსულ რბილ ძალას პროვოცირების მიზნებით შიდა პოლარიზაციის 50-ზე მეტი ბლოკი აქვს შემოგდებული, რათა ადამიანებმა, არ შეთანხმდებიან რა არაფერზე, ამოუწურავი ბოღმა და სიძულვილი ანთხიონ, როგორც სამოქალაქო ომის მუხტი“ – წერს კონსტანტინე გამსახურდია Facebook-ზე.

შეგახსენებთ, რომ რუსეთ-უკრაინის ფონზე, რესპუბლიკელმა ლევან ბერძენიშვილმა ქართლ-კახეთის მეფის, ერეკლე მეორის მოღალატედ გამოცხადება მოითხოვა იმ მიზეზით, რომ მან რუსეთთან ტრაქტატი გააფორმა. თანამედროვე პოლიტიკოსმა ერეკლე მეფის მიმართ საკუთარი კრიტიკა ქვეყნის პრემიერ-მინისტრ ირაკლი ღარიბაშვილის განცხადებებს დაუკავშირა, რომელმაც განაცხადა, რომ არ დაუშვებს საქართველოში მეორე ფრონტის გახსნას და რუსეთის წინააღმდეგ ომში ქვეყნის ჩათრევას.

“სანამ ერეკლე მეფე მოღალატედ არ არის გამოცხადებული, მანამდე ირაკლი ღარიბაშვილი გამოვა და – ომი გინდათ? ნუ ერეკლემაც მაგ თქვა, რა, – აბა ომი გინდათო, კაცო. მეომარი კაცი იყო, 80 ომი მოიგო, ჰოდა, მე მეკითხებოდა ომი გინდაო? მე არ მინდოდა ომი, არავის გვინდოდა ომი, მაგრამ რომ ჩააბარა მთელი საქართველო, როცა მარტო კახეთს აკონტროლებდა, ვინ მისცა მაგის უფლება? ხომ დაუწერა საკუთარმა შვილთაშვილმა ვინ მოგცა ნებაო“, – ამის შესახებ ქართველი ფილოლოგი და პოლიტიკოსი ლევან ბერძენიშვილი Youtube არხზე საუბრობს.

ამის შემდეგ სოციალურ ქსელში პერიოდულად ვრცელდება ვიდეოები, სადაც მოქალაქეები ქუჩაში ხვდებიან ბერძენიშვილს და მას ერეკლე მეფის შეურაცხყოფისთვის შეურაცხმყოფელი სიტყვებით მიმართავენ. საზოგადოების ერთმა ნაწილმა ამ ფაქტებს პოლიტიკოსის მიმართ ბულინგი უწოდა და ვიდეოს ავტორები გააკრიტიკეს.