იუსტიციის სახლში დღეიდან, საპენსიო სააგენტოს ყველა სერვისს მიიღებთ

1 მარტიდან იუსტიციის სახლში შესაძლებელია საპენსიო სააგენტოს ყველა სერვისის მიღება. როგორც იუსტიციის სახლის ინფორმაციიდან ვიგებთ, მომხმარებელს მომსახურების მიღება, მთელი საქართველოს მასშტაბით, იუსტიციის სახლის ნებისმიერ ფილიალში შეუძლია.

მათივე ინფორმაციით, იუსტიციის სახლსა და საპენსიო სააგენტოს თანამშრომლობის ფარგლებში, მომხმარებლებს შეუძლიათ, განაცხადი ისეთ სერვისებზე გააკეთონ, როგორიცაა: დაგროვებით საპენსიო სქემაში ჩართვა, სხვადასხვა საფუძვლით პენსიის დანიშვნა, საპენსიო სააგენტოს ვებგვერდზე ავტორიზაციის გავლა, ინდივიდუალური გვერდის პირველადი პაროლის მიღება/აღდგენა, სქემის მონაწილის ცნობის მიღება და სხვ.

აღსანიშნავია, რომ თბილისის ცენტრალურ იუსტიციის სახლში, საპენსიო სააგენტოს მომსახურების გაცემის პროცესს, იუსტიციის სახლის თავმჯდომარე ლაშა ლობჯანიძე და საპენსიო სააგენტოს დირექტორის მოადგილე – ანა კეკელიძე პირადად დააკვირდნენ. ამ თანამშრომლობის ფარგლებში, სერვისზე ხელმისაწვდომობა მთელი ქვეყნის მასშტაბითაა შესაძლებელი.

სალომე ხომასურიძე