„დღეს სტუდენტებს ევროპული სტანდარტის განათლებას ვაძლევთ” – სტუ საერთაშორისო პროექტში მონაწილეობს

საქართველოს ტექნიკური უნივერსიტეტის აგრარული მეცნიერებების და ბიოსისტემების ინჟინერინგის ფაკულტეტი, საერთაშორისო პროექტში DUGEOR მონაწილეობს. ეს არის 4-წლიანი პროგრამა, რომელშიც საქართველოს ტექნიკური უნივერსიტეტის აგრარულ მეცნიერებების და ბიოსისტემების ფაკულტეტი სატყეო საქმის საბაკალავრო-საგანმანათლებლო პროგრამითაა ჩართული.

სტუ-ის აგრარული მეცნიერებების და ბიოსისტემების ინჟინერინგის ფაკულტეტის დეკანის, პროფესორ გიგა ქვარცხავას თქმით, საერთაშორისო პროგრამაში ჩართვა დუალურ სწავლებაზე გადასვლას გულისხმობს. შესაბამისად, ფაკულტეტის აკადემიური პერსონალი და ხარისხის სამსახური „სატყეო საქმის“ საბაკალავრო პროგრამაში ცვლილებების შეტანაზე მუშაობს.

„დღეს ჩვენ სტუდენტს ევროპულ სტანდარტებთან შესაბამის განათლებას ვაძლევთ, თუმცა, ეს არ ნიშნავს რომ უნდა გავჩერდეთ. DUGEOR -ზე მუშაობა წელს, იანვარში დავიწყეთ. პროგრამის შემუშავებას ოთხი წელი დასჭირდება. დარწმუნებული ვარ, დუალური სწავლის მეთოდი სტუდენტს დღევანდელთან შედარებით, გაცილებით უკეთეს შედეგზე გაიყვანს. როდესაც დამიკავშირდნენ, გვკითხეს რომელი პროგრამით ვისურვებდით DUGEOR -ში მონაწილეობას. ფაკულტეტს რამდენიმე კარგი პროგრამის წარდგენა შეეძლო, მაგრამ კოლეგებთან კონსულტაციის გავლის შემდეგ, გადავწყვიტეთ, რომ ეს ყოფილიყო „სატყეო საქმე“. ამ ეტაპზე სატყეო მიმართულება არის ის წერტილი, სადაც საერთაშორისო ჩართულობა, სხვა პროგრამებისაგან განსხვავებით, შედარებით ნაკლებია.

ადამიანური და მატერიალური რესურსი, ასევე საქართველოში არსებული უნიკალური ტყის საფარი, „სატყეო საქმით“ DUGEOR -ში ჩართვის საშუალებას გვაძლევს. ეს არის მიმართულება, რომლის სტუდენტების 100% შეგვიძლია პრაქტიკებზე გავანაწილოთ. ადგილზე პრაქტიკით მივაღწევთ იმ შედეგს, რაზეც პროგრამაა ორიენტირებული”, – აცხადებს გიგა ქვარცხავა.

მისივე ინფორმაციით, საქართველოს პარტნიორები ამ პროექტში არიან ავსტრიის, გერმანიის და სერბეთის უნივერსიტეტები, სადაც ეს პროგრამა უკვე დანერგილია.

საქართველოს ტექნიკური უნივერსიტეტის რექტორის, აკადემიკოს დავით გურგენიძის თქმით, უნივერსიტეტი და აგრარული მეცნიერებების და ბიოსისტემების ინჟინერინგის ფაკულტეტის აკადემიური პერსონალი პარტნიორებთან ერთად ნაყოფიერად მუშაობენ DUGEOR-ის პროგრამაში.

„პროექტის – „დუალური განათლების განხორციელების შესაძლებლობების გაძლიერება საქართველოს უმაღლეს განათლებაში (DUGEOR)“, მიზანია: დუალური განათლების დანერგვა საქართველოს უმაღლესი განათლების სისტემაში; დუალური განათლების საშუალებით სტუდენტებისთვის მეტი შესაბამისი ცოდნისა და უნარების ათვისების შესაძლებლობა; საქართველოს საკანონმდებლო ბაზისა და აკრედიტაციის სტანდარტების დახვეწა დუალურ განათლებასთან ადაპტაციის მიზნით; დუალური განათლების ზოგადი მოდელის შემუშავება (DUGEOR მოდელი) საქართველოში სხვადასხვა საჭიროებებისა და ინტერესების მხარდასაჭერად სტუდენტებისთვის, კომპანიებისთვის, უმაღლესი საგანმანათლებლო დაწესებულებებისთვის და უმაღლეს სასწავლებლებისთვის რეკომენდაციების მიწოდებას დუალური განათლების განსახორციელებლად”, – აცხადებს დავით გურგენიძე.

პროექტის კონსორციუმი 16 წევრისგან შედგება, მათ შორის, 4 უცხოური (სერბეთი, ავსტრია, გერმანია), 5 ქართული უნივერსიტეტი და 5 პარტნიორი ორგანიზაცია. კონსორციუმის წევრია საქართველოს განათლებისა და მეცნიერების სამინისტრო და განათლების ხარისხის განვითარების ეროვნული ცენტრი.

“ეს არის მომავლის პროგრამა და შემთხვევითი არაა, რომ ამ გრანდიოზულ პროექტში საქართველოს ტექნიკური უნივერსიტეტია ჩართული. უნივერსიტეტს აქვს ყველა საშუალება პროექტი წარმატებით განხორციელდეს“, – აცხადებს დავით გურგენიძე.

ინფორმაციისთვის, „დუალური განათლების განხორციელების შესაძლებლობების გაძლიერება საქართველოს უმაღლეს განათლებაში (DUGEOR)“, დაფინანსებულია ევროკავშირის მიერ ERASMUS+ Capacity Building პროგრამის ფარგლებში. პროექტი 2023 წლის 1 იანვარს დაიწყო და 2026 წლის 31 დეკემბერს დასრულდება.