ცხოველთა წამებისა და მათდამი სასტიკი მოპყრობის ფაქტებზე, სისხლის სამართლებრივი პასუხისმგებლობა გამკაცრდა

დღეს, „სისხლის სამართლის კოდექსში“ დაგეგმილი ცვლილებები, პარლამენტმა  მესამე მოსმენით დაამტკიცა. ცხოველის წამებასა და სასტიკ მოპყრობაზე სასჯელი პროპორციულად გამკაცრდა. დღეიდან, მათ მიმართ, ვინც ცხოველებზე იძალადებს, სახელმწიფოს ადეკვატური რეაგირება ექნება.

მიღებული ცვლილებებით, ცხოველის წამება და სიკვდილი ჯგუფურად, საჯაროდ, არაერთგზის, არასრულწლოვნის თანდასწრებით, ორი ან მეტი ცხოველის მიმართ, ჯარიმით, შინაპატიმრობით ან თავისუფლების აღკვეთით დაისჯება.

„ბოლო პერიოდში ცხოველების მიმართ არასათანადო მოპყრობის ფაქტები გახშირდა, რაც სახელმწიფოს მხრიდან შესაბამისი ნაბიჯების გადადგმას საჭიროებს. მართალია, “სისხლის სამართლის კოდექსის“ თანახმად ცხოველების წამება და მათ მიმართ სასტიკი მოპყრობა დასჯადია, თუმცა, აღნიშნული დანაშაულის უკეთ პრევენციის მიზნით, მიზანშეწონილია, რომ მისი ჩადენისთვის პასუხისმგებლობა გამკაცრდეს“, – ნათქვამია კანონპროექტის განმარტებით ბარათში.