საქართველოში პოლიტიკოსებზე მეტად პატრიარქს ენდობიან – NATO-ში გაწევრიანება 65%-ს სურს

გამოკითხულთა უმრავლესობა ამბობს, რომ საქართველოს NATO-ში გაწევრიანების მთავარი სარგებელი უსაფრთხოებაა.

საერთაშორისო რესპუბლიკური ინსტიტუტი (IRI) საქართველოს მოქალაქეების საზოგადოებრივი აზრის კვლევას აქვეყნებს. ორგანიზაციის განმარტებით, კვლევა საქართველოში 4-დან 23 მარტის ჩათვლით ჩატარდა. მონაცემები შეგროვდა პირისპირ ინტერვიუს მეშვეობით. შერჩევა მოიცავდა საარჩევნო ხმის უფლებისა და ასაკის მქონე 1 500 რესპონდენტს. ცდომილების ზღვარი +/- 2.5 %-ია, ხოლო გამოპასუხების მაჩვენებელი – 74%.

კითხვაზე, გჯერათ, რომ საქართველოში ერთი პოლიტიკური პარტია მაინც გამოხატავს თქვენს ინტერესებს, პასუხები ასე გადანაწილდა:

გამოკითხულთა 42% ამბობს, რომ არცერთი პარტია არ გამოხატავს მის ინტერესებს;
25% – დიახ, სულ მცირე ერთი პარტია მაინც სრულად გამოხატავს ჩემს ინტერესებს;
29% – დიახ, სულ მცირე ერთი პარტია მაინც, მეტ-ნაკლებად გამოხატავს ჩემს ინტერესებს;
4% – ამბობს, რომ არ იცის ან კითხვას არ უპასუხებს.

კითხვაზე, ენდობით თუ არა საქართველოში პოლიტიკურ პარტიებს, პასუხები ასე გადანაწილდა:

გამოკითხულთა 46% ამბობს, რომ არც ენდობა და არც არ ენდობა;
39% – არ ენდობა;
13% – ენდობა;
2% – უარს ამბობს პასუხზე.

ახალი კვლევის მიხედვით, გამოკითხულთა 91% მოწონების მიხედვით პირველ ადგილზე საქართველოს პატრიარქს, ილია მეორეს ასახელებს.

პატრიარქის შემდეგ, გამოკითხულთა 52% ამბობს, რომ ყველაზე მოსაწონი საზოგადო ფიგურა კახი კალაძეა – 52%, კვლევის მიხედვით, მესამე ადგილს პრეზიდენტი, სალომე ზურაბიშვილი იკავებს – 48%, მის შემდეგ ადგილს კი პრემიერი ირაკლი ღარიბაშვილი – 43%.

გამოკითხულთა 36%-36% ამბობს, რომ ყოფილი პრემიერი, გიორგი გახარია და მესამე პრეზიდენტი, მიხეილ სააკაშვილი მოსწონთ. მათ შემდეგ კი 35%-ით რეიტინგში “ქართული ოცნების” დამფუძნებელი, ბიძინა ივანიშვილია.

ამავე გამოკითხვის თანახმად, უმრავლესობა NATO-ში გაწევრიანებას მტკიცედ მხარს უჭერს.

კითხვაზე მხარს უჭერთ თუ ეწინააღმდეგებით საქართველოს NATO-ში გაწევრიანებას, პასუხები ასე გადანაწილდა:

გამოკითხულთა 65% – მტკიცედ მხარს უჭერს;
15% – გარკვეულწილად მხარს უჭერს;
5% – გარკვეულწილად ეწინააღმდეგება;
9% – კატეგორიულად ეწინააღმდეგება;
6% – ამბობს, რომ არ იცის, ან კითხვას არ უპასუხებს.

გამოკითხულთა უმრავლესობა ამბობს, რომ საქართველოს NATO-ში გაწევრიანების მთავარი სარგებელი უსაფრთხოებაა.

კითხვაზე, თუ მხარს უჭერთ NATO-ში გაწევრიანებას, რა არის გაწევრიანების მთავარი სარგებელი, პასუხები ასე გადანაწილდა:

33% – უსაფრთხოება;
19% – თავდაცვა;
11% – ეკონომიკის გაძლიერება;
8% – სტაბილურობა / მშვიდობა;
4% – ქვეყნის განვითარება;
3% – უკეთესი მომავალი;
3% – სამხედრო მხარდაჭერა;
2% – ტერიტორიული მთლიანობის აღდგენა;
1% – რუსული აგრესიის შეჩერება;
4% – სხვა;
12% – ამბობს, რომ არ იცის ან კითხვას არ უპასუხებს.

გამოკითხულთა უმრავლესობა მიიჩნევს, რომ NATO-ში გაწევრიანების გზაზე მთავარი დაბრკოლება რუსეთის წინააღმდეგობაა.

კითხვაზე, რა არის ყველაზე დიდი დაბრკოლება საქართველოს NATO-ში გაწევრიანების გზაზე, პასუხები ასე გადანაწილდა:

23% – რუსეთის წინააღმდეგობა;
22% – ოკუპირებული რეგიონების სტატუსი;
19% – საქართველოში პოლიტიკური არასტაბილურობა;
11% – საქართველოში შიდა წინააღმდეგობა;
7% – NATO-ს ქვეყნების წინააღმდეგობა;
3% – სხვა;
15% – ამბობს, რომ არ იცის ან კითხვას არ პასუხობს.