კვლევის ცენტრმა ისტორიული მესხეთის კულტურული მემკვიდრეობა აღნუსხა

ახალციხის მუნიციპალიტეტში 16 დღიანი საკვლევი ექსპედიცია წარმატებით დასრულდა. კვლევის ცენტრმა მესხეთში არსებული კულტურული მემკვიდრეობის ძეგლები აღნუსხა. ექსპედიციის მონაწილეებმა, ახალციხის მუნიციპალიტეტის 80-მდე სოფელსა და ნასოფლარში, 150-მდე კულტურის ძეგლი თუ ცალკეული არტეფაქტი აღწერეს. გარდა ამისა, ტაძრების ინტერიერში დაფიქსირდა რამდენიმე ნაკაწრი წარწერა და აღიწერა ლაპიდარული წარწერები (გაკეთდა პალეოგრაფიული ასლები). საბოლოოდ, პროექტის ,,ისტორიული მესხეთის მატერიალური კულტურის ძეგლების ორენოვანი კატალოგის” ფარგლებში, 70-მდე ეკლესია, 7მონასტერი, 15-მდე ციხე-კოშკი, 6 მეჩეთი, 2 ხიდი (ან ხიდის ფრაგმენტი), 10-მდე დარანი, 10- მდე სხვა კულტურის ძეგლი (აბანო, წყაროს ნაგებობა, მესხური დარბაზი და სხვა) და 30-მდე ცალკეული არტეფაქტი დაფიქსირდა. პროექტი  შოთა რუსთაველის საქართველოს ეროვნული სამეცნიერო ფონდის ფინანსური მხარდაჭერით განხორციელდა.

 

მოგეხსენებათ, მესხეთში, უმდიდრესი არქეოლოგიური მასალა თუ კულტურული ძეგლები, რომლებიც ათასწლეულებს ითვლიან, დღემდე არ არის ბოლომდე შესწავლილი. სწორედ ამიტომ, კვლევის ცენტრი ახალციხეს შემოდგომაზე კვლავ დაუბრუნდება. მანამდე კი, ექსპედიციის მონაწილეები, აგვისტოს თვეში, ადიგენის ექსპედიციისთვის ემზადებიან.

 

ლიკა მაჩხანელი

იხილეთ ფოტოკოლაჟი: