შოვში, 7 ადამიანს კვლავ აქტიურად ეძებენ

როგორც ცნობილია, შოვში, სტიქიის შედეგად დაღუპულთა რიცხვი 26-მდე გაიზარდა, 7 ადამიანს კი კვლავ აქტიურად ეძებენ.

რაჭა – ლეჩხუმ – ქვემო სვანეთის სახელმწიფო რწმუნებულის, პაპუნა მარგველიძის განცხადებით, ამ დროისთვის, სტიქიის ზონაში ნაპოვნი 26 მოქალაქის ცხედრიდან მხოლოდ 23-ია იდენტიფიცირებული.

მისივე თქმით, პრემიერ – მინისტრის გადაწყვეტილებით, სამძებრო სამუშაოები გაგრძელდება მანამ, სანამ მცირედი თეორიული შანსიც კი იქნება მოქალაქეების პოვნისა.

დღეს, სტიქიის ზონაში იმყოფებოდა საქართველოს თავდაცვის ძალების მეთაური გიორგი მათიაშვილი, რომელიც  შესრულებულ და მიმდინარე სამძებრო-სამაშველო სამუშაოებს პირადად გაეცნო და ჯარისკაცებს მადლობა გადაუხადა.

აღსანიშნავია, რომ სამძებრო- სამაშველო სამუშაოებში აღმოსავლეთისა და დასავლეთის სარდლობების სამხედრო მოსამსახურეები, საბრძოლო-საინჟინრო ქვედანაყოფები, ლოჯისტიკური უზრუნველყოფის სარდლობა და ეროვნული გვარდიის მე-10 კადრირებული ბრიგადის 102-ე ტერიტორიული თავდაცვის ბატალიონია ჩართული.

შოვში, მეწყერი 3 აგვისტოს ჩამოწვა. სტიქიის ზონიდან, ამ დროისთვის, 210 ადამიანია გამოყვანილი.