პოლონეთის გუნდი მსოფლიო ჩემპიონატის მოქმედ ჩემპიონს დაუპირისპირდა

მსოფლიო ჩემპიონატის მოქმედი ჩემპიონი – საფრანგეთი, მერვედფინალში პოლონეთს დაუპირისპირდა. თამაში ორივე გუნდმა საკმაოდ აქტიურად დაიწყო. პოლონელებმა კარგი შთაბეჭდილება დატოვეს და რამდენიმე რეალური საგოლე მომენტიც შექმნეს. თამაშის 44-ე წუთზე საფრანგეთმა ანგარიში გახსნა.

მეორე ტაიმში პოლონეთის ნაკრები ისევ აქტიურობდა, თუმცა საფრანგეთმა გოლის გატანა მაინც შეძლო და უპირატესობა ორამდე გაზარდა. 74-ე წუთზე კილიან მბაპეს გოლით საფრანგეთი კიდევ უფრო დაწინაურდა. მსაჯის მიერ დამატებულ წუთებში პოლონეთის ნაკრებმა პენალტის დარტყმის უფლება მოიპოვა და თამაშში ერთადერთი გოლი გაიტანა. საბოლოოდ, შეხვედრა საფრანგეთის სასარგებლოდ დამთავრდა – 3:1.

ჩემპიონატის მერვედფინალში ერთმანეთს ინგლისის და სენეგალის ნაკრებებიც დაუპირისპირდნენ. შეხვედრის პირველი ნახევარი მოსაწყენი აღმოჩნდა. 38-ე წუთზე ინგლისმა ანგარიშის გახსნა მოახერხა და მალევე მოპოვებული უპირატესობა ორამდე გაზარდა.

მეორე ტაიმში ვითარება არ შეცვლილა, ინგლისის ნაკრები ისევ უპირატესობას ფლობდა და სენეგალს შანსს არ უტოვებდა. 57-ე წუთზე ბუკაიო საკას გატანილი გოლით, ინგლისმა საბოლოო ანგარიში დააფიქსირა – 3:0. ამ გამარჯვების შემდეგ ინგლისის ნაკრები მეოთხედფინალში გავიდა, სადაც მსოფლიოს მოქმედ ჩემპიონს – საფრანგეთის ნაკრებს – დაუპირისპირდება.

თაკო ბოკუჩავა