ფეხბურთში 21-წლამდელთა ევროპის ჩემპიონატისთვის ჟურნალისტთა აკრედიტაცია იწყება

21-წლამდელთა ევროპის ჩემპიონატზე, ჟურნალისტებისთვის აკრედიტაციების გაცემა იწყება, – ამის შესახებ ინფორმაციას, საქართველოს ფეხბურთის ფედერაციის ვებგვერდი ავრცელებს.

როგორც ცნობილია, ტურნირი საქართველოსა და რუმინეთში, 21 ივნისიდან 8 ივლისის ჩათვლით გაიმართება. მედიის წარმომადგენელთა აკრედიტირების პროცესი კი, შესაძლებელი უეფა-ს ოფიციალური მედია პლატფორმაზე იქნება.

„მედიის წარმომადგენლები, ვინც ამ დრომდე არ არიან დარეგისტრირებული უეფა-ს მედია პლატფორმაზე, თავდაპირველად, უნდა დარეგისტრირდნენ აღნიშნული ბმულის გამოყენებით – UEFA Media Channel. მოგვიანებით კი, 21-წლამდელთა ევროპის ჩემპიონატის აკრედიტაციაზე უნდა გააკეთონ განაცხადი.

უშუალოდ ჩემპიონატის აკრედიტირების პროცესი, უეფა-ს მედია პლატფორმაზე (FAME) რეგისტრირებული მედიის წარმომადგენლებისთვის, 14 აპრილს გაიხსნება და 7 მაისს, თბილისის დროით 17 საათზე დაიხურება” – წერია სფფ-ის პრესსამსახურის განცხადებაში.

შეგახსენებთ, რომ 21 ივნისიდან 8 ივლისის ჩათვლით, საქართველოში უეფა-ს 21-წლამდელთა ევროპის ჩემპიონატის, 16 შეხვედრა გაიმართება. მათ შორის, ჯგუფური ეტაპის 12 მატჩი, ორი მეოთხედფინალი, ნახევარფინალი და ფინალური შეხვედრა, რომელსაც ბათუმი უმასპინძლებს.

სალომე ხომასურიძე