სეულმა გამოთქვა მზადყოფნა უკრაინას იარაღი მიაწოდოს
“მჯერა, რომ არ იქნება შეზღუდვები იმ ქვეყნის თავდაცვისა და რეკონსტრუქციის მხარდასაჭერად, რომელშიც არალეგალურად შეიჭრნენ”, – განაცხადა იუნ სუკ-იოლიმ.
სამხრეთ კორეის პრეზიდენტ იუნ სუკ-იოლის განცხადებით, კორეა გააფართოებს უკრაინის მიმართ მხარდაჭერას, რომელიც გასცდება მხოლოდ ჰუმანიტარული და ეკონომიკური დახმარების ფარგლებს, იმ შემთხვევაში, თუ უკრაინის მშვიდობიან მოსახლეობაზე ფართომასშტაბიანი თავდასხმა განხორციელდება, – ამის შესახებ Reuters-ი იტყობინება.
ეს პირველი შემთხვევაა, როდესაც სეულმა გამოთქვა მზადყოფნა უკრაინას მიაწოდოს იარაღი, ლეტალური დახმარების შესაძლებლობის გამორიცხვიდან ერთ წელზე მეტი ხნის შემდეგ.
“თუ შეიქმნება სიტუაცია, რომელსაც საერთაშორისო საზოგადოება ვერ მოითმენს, როგორიცაა ნებისმიერი ფართო თავდასხმა მშვიდობიან მოსახლეობაზე, ხოცვა-ჟლეტა ან ომის კანონების სერიოზული დარღვევა, შეიძლება გაგვიჭირდეს მხოლოდ ჰუმანიტარული ან ფინანსური მხარდაჭერა”, – განაცხადა ქვეყნის პრეზიდენტმა.
აშშ-ს მთავარი მოკავშირე და საარტილერიო საბრძოლო მასალის მთავარი მწარმოებელი სამხრეთ კორეა ჯერჯერობით ცდილობს თავიდან აიცილოს რუსეთთან დაპირისპირება იქ მოქმედი კომპანიებისა და ჩრდილოეთ კორეაზე მოსკოვის გავლენის გამო, მიუხედავად დასავლეთის ქვეყნების მხრიდან იარაღის მიწოდების მზარდი ზეგავლენისა.
“მჯერა, რომ არ იქნება შეზღუდვები იმ ქვეყნის თავდაცვისა და რეკონსტრუქციის მხარდასაჭერად, რომელშიც არალეგალურად შეიჭრნენ, როგორც საერთაშორისო, ასევე შიდა კანონმდებლობით. თუმცა, ომში ჩართულ მხარეებთან ურთიერთობისა და ბრძოლის ველზე განვითარებული მოვლენების გათვალისწინებით, ჩვენ მივიღებთ ყველაზე შესაბამის ზომებს”, – განაცხადა პრეზიდენტმა.
ეს განცხადება კეთდება სამხრეთ კორეის პრეზიდენტის აშშ-ში ვიზიტამდე ცოტა ხნით ადრე. მომავალ კვირას იუნი ვაშინგტონს ეწვევა და აშშ-ს პრეზიდენტ ჯო ბაიდენს შეხვდება.
